Ordiziako Oiangu Pilota elkarteak, Frantziako Pau hirian ospatutako Paleta Tour Txapelketan parte hartu zuen, apirilaren 2tik 5era bitartean. Berrogei pertsona inguruko taldea osatu zuten, adin ezberdinetako pilotariak, entrenatzaileak eta gurasoak barne, nazioarteko zirkuitu honetan duten parte-hartzea sendotuz.

Hainbat urte daramatzate Oianguko pilotariek Gazteen Paleta Larruzko Nazioarteko Zirkuituan lehiatzen. Iaz izan zen klub gisa joan ziren lehen urtea, eta aurten ere esperientzia errepikatu dute, beren presentzia finkatuz nazioarteko eszenan.

Txapelketak lau egun iraun zuen, eta guztira 11 taldek eta 360 pilotari inguruk hartu zuten parte. Partidak goizetik iluntzera arte jokatu ziren. Gipuzkoatik, Oiangurekin batera, Oiartzungo Txost elkarteko kideak ere lehiatu ziren.

Hamasei gaztek ordezkatu zuten Oiangu, hainbat mailatan banatuta: E12 mailan lau pilotari, E14 mailan hiru, E16 mailan hiru, E19 mailan bi eta nagusien mailan lau. Emaitza bikainak lortu zituzten, E12 kategorian bigarren postua eta E19 kategorian hirugarren postua eskuratuz. Klubetik azpimarratu dutenez, “oso emaitza duinak dira elite mailan lehiatu dugula kontuan izanik”. Txapelketa osoko sailkapen orokorrean, Oianguk zazpigarren postuan amaitu zuen.