Legazpik Santikutz Eguna ospatu du gaur, herriko kaleetan goizean goizetik giro ederra nagusitu delarik. Musika izan da protagonista nagusia, Goiz Deia txistulari taldearen kalejirarekin hasi eta Iruñeko Ezpelur dultzainero taldearen doinuekin jarraituz.
Urteroko ohiturari jarraituz, Mirandaolako Gurutze Santuaren prozesioa egin da eliza atarian, txistulari eta ezpata-dantzariek lagunduta. Ondoren, Jasokunde Amaren Eliza Nagusian Meza Nagusia ospatu da, Santikutz abesbatzaren kantuekin girotuta.
Eguneko jarduera nagusietako bat Olaria sariaren banaketa izan da, 12:00etan. Saridunak eta Udal Korporazioa Udaletxetik Euskal Herria plazaraino joan dira, non Legazpiko Ezpata-dantza ekitaldia ospatu den, Sustraiak Dantza Taldearen eskutik.
“"Prestakuntza eta gizarte balioen sustapenean egin duen lana aitortzeko asmoz."
Aurten, Judo Legazpi klubak jaso du Olaria saria, alkateak adierazi duenez, “prestakuntza eta gizarte balioen sustapenean egin duen lana” aitortzeko. Klubaren izenean, bi ordezkarik jaso dute saria, eta eskerrak eman dizkiete herritarrei eta erakundeei jasotako babesagatik.
