Joxe Migel Iztueta Kortajarena, Lazkao Txiki izenez ezaguna, jaio zela 100 urte betetzen diren urte honetan, haren omenezko ekitaldi jendetsua egin da Lazkaon. Bertsolariaren izena daraman plazan, eta hari eskainitako harrizko eskulturaren aurrean, ehunka lagun bildu dira haren figura gogoratzeko.

Omenaldia Oin Arineko hiru dantzarik egindako Agurrarekin hasi da, Lazkao Txiki Musika Eskolako bi trikitilarik lagunduta. Ondoren, musika eskolako adinekoen taldeak eta Bakuntza taldeko kideek hainbat koreografia eta abesti interpretatu dituzte, giro alaia sortuz.

Bertso saioak izan dira ekitaldiaren ardatz nagusietako bat. Lazkao Txikirekin plazak partekatu zituzten bertsolari beteranoek, hala nola Iñaki Murua, Millan Telleria eta Jexux Mari Jauregi Altzo Txiki, eta baita gazteagoek ere, Iban Urdangarin eta Iñaki Apalategi kasu. Hauek, Lazkao Txikik utzitako esanak eta perlak bertsotan gogoratu dituzte, kopla eran kantatuz.

Ekitaldiaren amaieran, musika eskolako abesbatzak eta Gipuzkoako Bertso Eskoletako ordezkariek ere parte hartu dute, bertso eta kantu emanaldiekin. Egun horretan bertan, Gipuzkoako Bertso Eskolen Eguna ere ospatu da Lazkaon, 5. eta 6. mailetako 80 haur inguru bilduz, bertso lehiaketetan parte hartzeko.