Lazkaoko Udalak abenduaren 10ean, 17:30etik 19:00etara, udaletxeko bilkuren aretoan ospatuko duen topaketa irekiarekin amaituko du zaintzen inguruko hausnarketa-prozesua. Herritar guztiei zuzendutako ekitaldi honetan, azken hilabeteetan egindako lanaren emaitzak aurkeztuko dira, herri zaintzaileago, irisgarriago eta inklusiboago baterantz aurrera egiteko helburuarekin.
Orain arte egindako bost saiotan, parte-hartzaileek aurreko topaketetan jasotako ekarpenak eta hausnarketak bateratu dituzte. Prozesuan udal ordezkari politikoek eta teknikariek, herriko elkarte eta eragileek eta zaintzaren errealitatea gertutik ezagutzen duten herritarrek hartu dute parte, elkarlanean.
Elkarlan horren bidez, Lazkaoko zaintzen egungo egoera aztertu dute, beharrak eta erronkak identifikatu eta etorkizunera begirako aukeren inguruan hausnartu dute. Horrez gain, beste herri eta komunitate batzuetako esperientziak ezagutu dituzte, hala nola zaintzaileei laguntzeko ekimenak, bakardadeari aurre egiteko egitasmoak, autonomia pertsonala sustatzeko ereduak eta belaunaldien arteko bizikidetza indartzeko proposamenak.
Azken saio ireki honetan, prozesuan jasotako ekarpenetatik ateratako ondorio nagusiak eta zaintzen etorkizunerako identifikatutako erronkak eta proposamenak ezagutaraziko dira. Era berean, zaintza komunitate osoari dagokion erronka dela azpimarratuko da, herritarren ongizatean eta herriaren etorkizunean duen garrantzia nabarmenduz.
