Igartubeiti Baserri Museoa k 25 urte betetzen ditu aurten eta urriaren 7tik 17ra bitartean ospatuko du Sagardo Astearen XXV. edizioa. Aurtengo edizioak, ohiko jarduerez gain, bereziak ere izango ditu urteurrena ospatzeko. Erronka Garbia ziurtagiriari jarraiki, neurriak hartuko dira mugikortasuna, energia, ura, erosketak, azpiegiturak eta hondakinak ardatz hartuta.
Bisitariak Igartubeiti Baserri Museora garraio publikoan etortzea sustatuko da, eta hori posible ez denean, Ezkioko industriagunetik museora doan autobus zerbitzua erabiltzea bultzatuko da. Hondakinen kudeaketa ere helburu nagusietako bat izango da, ahalik eta hondakin gutxien sortuz eta sortzen direnak sailkatuz. Uraren erabileran ere eragina izango du Erronka Garbiak, kontsumoa murrizteko eta kontrolatzeko neurriak hartuko baitira.
Igartubeiti Baserri Museoak urteak daramatzatzan baserriaren aberastasuna lantzen, eta bere zaintzatik hasita, ingurunearen, baliabideen eta zerbitzuen arteko oreka bilatzen du. Sagardo Astea sagarraren ziklo naturalaren emaitza da, eta sagarrondoak zaindu, hauen izerdialdia, loraldia, sagar aleen hazkundea eta bilketa prozesuak ere ingurumen inpaktu txikiena izan dezaten egiten dira. Adibidez, Sagardo Astean zanpatzen den sagarra Ezkio inguruko hornitzaileen bidez lortzen da, produktuaren trazabilitatea ahalik eta murritzena izan dadin.
Museoak Ingurumen Jasangarritasun Planaren baliozkotzea lortu du eta horri esker, Erronka Garbia ziurtagiria estreinatuko du Sagardo Astean. Jasangarritasun plan honek lehentasunezko sei ardatz identifikatzen ditu ekitaldiak ingurumen aldetik hobetzeko: mugikortasuna, energia, ura, erosketak, azpiegiturak eta hondakinak. 'Erronka Garbia' proiektuaren helburu nagusia kontzientziatzea da, bai antolatzaileak eta baita parte hartzaileak ere.
