IX. Segura-Zerain mendi lasterketa ospatu da gaur goizean, bi distantziatan banatuta. Proba luzea Segurako plazatik abiatu da 09:30ean, 25 kilometroko ibilbidea osatzeko. Proba motzekoa, berriz, ordu erdi beranduago hasi da, 14,5 kilometroko ibilbidearekin.

Distantzia laburrean, Goierriko korrikalariek osatu dute podiuma, bai gizonezkoetan bai emakumezkoetan. Gizonezkoetan, Azeddine Elhamidi zegamarrak irabazi du 1:08:47ko denborarekin. Bigarren postuan Pello Olaberria mutiloarra sailkatu da 1:12:00rekin, eta hirugarren Iban Sanjuan zegamarra 1:12:19ko denborarekin. Emakumezkoetan, Intza Urrestarazu ordiziarra izan da nagusi, eta haren atzetik Nora Anton lazkaotarra 1:31:01eko denborarekin eta Nerea Beldarrain segurarra 1:34:58ko denborarekin.

Irabazleek, ohiturari jarraituz, lasterketaren ikur bihurtu den Sanson harriaren erreplikarekin zeharkatu dute helmuga. Guztira 31 sari banatu dira, Daniel Bonikowskyren Made in Segura zigilupean egindakoak. Irabazleen sariez gain, aurten ere, Segura, Zerain eta Mutiloako kintada jendetsuenari saria eman diote, baita 15 eta 17 urte bitarteko gazteei zuzendutako gazteen saria ere.

Eguraldi onak lagunduta, giro bikaina nagusitu da goiz osoan zehar, eta jende ugari bildu da Segurako kaleetan eta ibilbidean zehar korrikalariak animatzeko.