Aurten, Aralar mendilerroko larreetan 17.654 abelburuk dute bazkatzeko baimena, eta horietatik 15.112 ardiak dira. Guztira 150 abeltzainek dute baimena, eta horietatik 61 (%40,7) dira ATP (Nekazari Titular Nagusia) maila dutenak. Maila horrek adierazten du beren errentaren %50 baino gehiago nekazaritza jardueratik lortzen dutela, eta lan-denboraren erdia baino gehiago nekazaritza lanetan ematen dutela.

Txostenak adierazten duenez, ATP mailako abeltzainek karga nagusia hartzen dute, nahiz eta kopuruz gehiengoa ez izan. UGM/ha (Ganadu Larriaren Unitatea hektareako) karga intentsitatea 0,80koa da, eta mankomunitatearen arabera, kopuru hori “moderatua” da.

Abeltzainen profilari dagokionez, 150 abeltzain horietatik 46 emakumezkoak dira, 87 gizonezkoak eta 16 elkarte zibilak. Espezieka, ardiak dira mendiko larreen erabiltzaile nagusiak, bai kopuruz bai UGM kargaz. Hala ere, ardien kopurua urtez urte gutxitzen ari dela erakusten du bilakaerak. Behien eta behorren kopurua, berriz, goranzkoa da, eta ahuntzen karga txikia bada ere, haien kopurua ere handitzen ari da 2024tik aurrera.

Mankomunitateak egindako interpretazioaren arabera, Enirio-Aralarko larreak ez daude gainkargatuta orokorrean, eta kudeaketa jasangarria dela ondoriozta daiteke. Hala ere, “eremu eta data konkretu batzuetan gainkargak sor” daitezkeela ohartarazi dute, ardiak direlarik “presio nagusia” sortzen dutenak, baina haien banaketa orekatua dela azpimarratuz.