Ordiziako udal korporazioko emakume hautetsiek bilera batean parte hartu zuten joan den astean, Basqueskola ekimenaren barruan. Saioaren helburua zen emakumeek tokiko politikan jasaten dituzten indarkeria eta sexismo kasuak aztertzea, hausnarketarako eta esperientziak partekatzeko gune bat sortuz.

Topaketa Udaletxeko osoko bilkuren aretoan egin zen, eta bertan “entzute eta hausnarketa partekaturako gune aberasgarria” sortu zen. Bertan, tokiko politikan emakumeen presentzia eta ahalduntzea bultzatzen jarraitzearen garrantzia azpimarratu zen. Parte-hartzaileek alderdi politikoen barruan zein jarduera politiko instituzionalean bizi izan dituzten egoera mugatzaileak, zailtasunak eta normalizatutako jarrerak partekatu zituzten. Era berean, esperientzia indibidual eta kolektibotik garatu dituzten indargune eta estrategiei buruz hausnartu zuten.

Saioa Basqueskolako kideek dinamizatu zuten, emakume hautetsien arteko prestakuntza, laguntza eta sareak sortzeko guneak indartzeko helburuarekin. Virginia Woolf Basqueskola EUDELek eta Emakundek bultzatutako ekimena da, EAEko alkate eta zinegotziei zuzendua, emakumeen ahalduntzea sustatzeko helburuarekin, berdintasunerantz aurrera egiteko estrategia gisa, esperientzia partekatutik abiatuta garapen pertsonal eta kolektiborako tresnak eskainiz.