Larunbatean, 17:55ean hasita, jokatuko da Ordiziako Mitinaren 10. edizioa. Txindoki-Jaso Atletismo Taldeak antolatutako ekitaldiak atleta aipagarriak bilduko ditu eta hainbat berrikuntza aurkeztuko ditu. Lehiaketa baino egun bat lehenago, ostiralean, 20:00etan, atleten aurkezpen ofiziala egingo da Ordiziako herrigunean.
Aurkezpenean, Eneko Agirrezabal Txindoki atletismo taldeko lehendakariak eta Adur Ezenarro eta Leire Artola, Ordiziako eta Beasaingo alkateek, besteak beste, atletismo taldearen lana eta ekimenaren hazkundea eskertu zuten. Mitina nazioarteko mailara iritsi da, World Athletics Continental Tour Bronze mailan kokatuz.
Antolatzaileek kalitatezko atletismoa eskaintzea eta proba erakargarriak izatea dute helburu, berdintasuna eta inklusioa balioak mantenduz. Aurten, luzera jauzia lekuz aldatu eta harmaila gehigarriak jarriko dituzte, 1.200 ikuslerentzako lekua bermatuz. Familiei eta gaztetxoei zuzendutako eskaintza ere zabalduko da, puzgarriekin.
Kirol jardueratik harago, Beasainen 'Emakumeak atletismoan' izeneko hitzaldia antolatu da gaur, 19:00etan Igartza jauregian, eta ikuskizuna hobetzeko argiztapen espezializatua kontratatu dute.
Atleta nabarmenen artean izango dira, besteak beste, 100 metroko lasterketan Desiree Henry, Eric Cardoso eta Felipe Bardi; 400 metrokoan Oscar Husillos; 800 metrokoan Moad Zahafi; 1500 metrokoan Mariano Garcia; 110 metro hesietan Asier Martinez; luzera jauzian Fatima Diame eta Irati Mitxelena; eta pisu-jaurtiketan Belén Toimil eta Maria Vicente.
Gainera, Ordiziako Mitinak ziurtagiri bat jaso du jasangarritasunaren arloan egindako lanagatik, ingurumen-irizpideak antolakuntzan txertatuz.
