Beasaingo Udalbatzak 2027ko ordenantza fiskalei hasierako onespena eman zien urriko osoko bilkuran. Urteko Kontsumorako Prezioen Indizeak (%4,5) gorakada nabarmena izan duen arren, udal gobernuak azpiko KPIa (%2,9) hartu du erreferentzia gisa, herritarren poltsikoetan eragin handiegirik ez sortzeko asmoz. Erabaki honek EAJren (9) eta Podemosen (1) aldeko botoak jaso zituen; PSE-EE (2) abstenitu egin zen eta EH Bilduk (5) aurka bozkatu zuen. Halaber, bilkuran aho batez berretsi ziren egonaldi turistikoen gaineko zerga berria, Plazape tabernaren kudeaketa eta Astigarretako plaza berriari Pepe Mujica izena jartzea.
Udal tasen eta zergen berrikuspena herritarrei zuzen-zuzenean eragiten dien erabaki estrategikoa da. %4,5eko KPI orokorraren aurrean, Udalak azpiko KPIa (%2,9) hartu du, ezohiko gorakada horiek arintzeko. Igoera orokor honekin batera, gizarte-babesean urrats nabarmena egin da: Ondasun Higiezinen Gaineko Zergan (OHI) familia ugariek zituzten hobariak zabaldu dira guraso bakarreko familientzat, etxeko zein genero-indarkeriaren biktimentzat eta kalteberatasun-egoeran dauden herritarrentzat. Hobarien ehunekoa familia-errenta estandarizatuaren arabera kalkulatuko da, %90erainoko mugarekin. Gainera, genero-ikuspegia eta hizkuntza inklusiboa ordenantza guztietan txertatu dira lehen aldiz.
Herritarren egunerokotasunari eragiten dioten zerbitzu eta tasa ugari aldatu gabe mantenduko dira, hala nola Antzizar kiroldegiko eta Usurbe antzokiko sarrerak, Errekarga puntuak, OTA zerbitzua, Etxe Babestuak zein Etxez Etxeko Laguntza, Udalekuak, azterketa tasak eta udal argitalpenak. Tasen atalean, Hilerri Zerbitzuan nitxoetako plaken tasak zehaztu dira eta Udaltzaingoaren eskariz, garabi zein ibilgailuen ibilgetze tasak egokituko dira.
Osoko bilkuran aho batez onartu ziren beste gai batzuk ere: Egonaldi Turistikoen Zerga berria, Plazape tabernaren kudeaketa Ardoa eta Azoka S.L. enpresari esleituz, eta Astigarretako plaza berriari Pepe Mujica izena jartzea. Horrez gain, Udal Euskaltegia erakunde laguntzaile izendatu da C1 mailako ikasleen eta hasierako mailetakoen dirulaguntzak kudeatzeko, eta Argiteria Publikoaren Mantenua Loyola Norte S.A. enpresari luzatu zaio.
Gobernu Batzordeak, bere aldetik, azpiegitura eta zerbitzu sozialak indartzeko erabakiak hartu ditu. Gazteleku Berriko Kudeaketa Zerbitzua Loiri Aisialdia eta Kirola enpresari esleitu zaio, eta Txita enpresak banaketa jasangarria bideratuko du. Gainera, Kalea Argitzeko LED Teknologiaren 3. fasea Tecuni enpresari esleitu zaio, Beasaingo erdigunearen %80 LED teknologian sartuz.
