Topaketa honetan, Zumarragako, Urretxuko, Legazpiko, Ezkio-Itsasoko eta Antzuolako udal ordezkariek eta gizarte, ekonomia eta beste erakundeetako eragileek parte hartu dute. Helburua eskualdeko segurtasunaren diagnosiak, esperientziak eta proposamenak jasotzea izan da, parte-hartze dinamika baten bidez.
Bertaratutakoek esperientziak elkartrukatzeko aukera izan dute, eremuko segurtasuna indartzeko asmoarekin. Segurtasunaren ikuspegi zabala landu da, esparru polizial hutsa gaindituz, prebentzioa, larrialdiak, trafikoa edo ingurune naturala ere jorratuz. Larrialdien kudeaketa, ziberdelinkuentzia, emakumeen aurkako indarkeria, bide segurtasuna, drogen kontsumoa eta klima-aldaketak ingurumenean duen eragina izan dira landu dituzten gaietako batzuk.
Bileran Segurtasuneko sailburu Bingen Zupiriak eta Gipuzkoako diputatu nagusi Eider Mendozak ere parte hartu dute, baita Eusko Jaurlaritzako Segurtasun Sailaren, Gipuzkoako Foru Aldundiaren eta eskualdeko udalen beste ordezkari batzuek, Ertzaintzako agenteek eta udaltzainek ere. Horrez gain, Goierri garaiko gizarte, hezkuntza eta enpresa arloetako eragileek ere parte hartu dute, azterketa ikuspegi ezberdinetatik aberasteko.
Basque Segurtasun Foroa parte hartze prozesu bat da, segurtasunari buruzko diagnostiko partekatu bat ikuspegi integral batetik eraikitzeko.
Gaurkoa Basque Segurtasun Foroaren 23. bilera izan da, eta aurretik Euskadi osoan zehar hainbat saio egin dira, besteak beste, Bizkaiko, Arabako eta Gipuzkoako hainbat eskualdetan. Prozesu honek hainbat erakunde, entitate eta eragileri topagune bat eskaintzen die segurtasunarekin lotutako gaiak lantzeko, hala nola herritarren segurtasuna, larrialdi klimatikoa, mugikortasuna, ekitaldi handiak, zibersegurtasuna eta larrialdiak. Hurrengo bilera apirilaren 21ean izango da, Gernika-Lumon (Bizkaia).
