Taldearen sorrera 2022aren amaieran hasi zen, taldeko kide batek gitarra hartu eta ideiak konposatzen hasi zenean. Hasierako grabaketak etxeko ordenagailu zahar batean egin ziren, gitarra, bateria programatuak, baxua eta teklatua erabiliz. Abesti ugari bildu ondoren, estudio batean grabatzeko nahia sortu zen, eta horretarako musikariak bilatzen hasi ziren.
Hasierako entseguak Hondarribiko Psilocyben egin ziren, baina proiektuak ez zuen aurrera egin hasierako kideekin. Denborarekin, musikari askok parte hartu dute ekimenean, eta azkenean, 2025eko erdialdean, Min taldea sortu zen. Taldea Maite Martiarena, Suharri Aranburu, Jon Sarasketa, Ibon Telleria eta Ion Brakamontek osatzen dute, bakoitza aurretik beste musika proiektu batzuetan aritua.
Estilo desberdinetatik etorri arren, abestien oinarri instrumentala ia osatuta zegoen, eta entsegu lokalean moldaketak egin zituzten. Taldeko kideek adierazi dutenez, zailena hitzak sortzea eta ahots doinuak aurkitzea izan da. Lehen kontzertua 2025eko abenduaren 20an eman zuten Zestoako Gaztetxean, Gailu taldearekin batera. Esperientzia bikaina izan zen, gaztetxea lepo bete baitzen eta publikoaren harrera oso ona izan baitzen.
“"Erronka handia izan zen guretzat, entsegu gutxirekin iritsi baikinen, baina esperientzia bikaina izan zen: gaztetxea lepo bete zen eta jendearen harrera zoragarria izan zen. Horrela hasi daiteke!"
Diskoa 2025eko urrian grabatu zen Gaztain estudioan, Eñaut Gaztañagaren gidaritzapean. Prozesuarekin gustura daude, baina sustapenak eta sare sozialen kudeaketak kezka sortzen die. Dena ondo bidean, diskoa martxoaren hasieran argitaratuko da. Datozen hilabeteetarako, kontzertuak lotuta dituzte otsailaren 7an Azkoitian eta martxoaren 13an Tolosako Bonberenean, eta Zumaian ere jotzeko aukera aztertzen ari dira.
Aurrerapen abestia, Haizea dabil, gizakiaren kontrol nahiari buruzko hausnarketa bat da, munduan dabilen “haize berri” bati buruzkoa.
