Beka hauek, Ondare Historiko-Artistiko, Bilduma eta Museo Zerbitzuak kudeatuta, Gipuzkoako gazteen prestakuntza osatzea dute helburu, ondare kulturalarekin lotutako hainbat arlotan.
Zehazki, foru erakundeak azaldu duenez, deialdiak beka bat aurreikusten du arlo etnografikoko prestakuntza praktikak egiteko, beste bat arte eta etnografia kontserbazio eta zaharberritze praktikak egiteko, bat arkeologiako praktikak egiteko eta azken bat dokumentazio eta erregistroko prestakuntzarako.
“"Beka hauek tresna garrantzitsuak dira beren etorkizun profesionala ondare kulturalera bideratu nahi duten gazteei bidea irekitzeko. Gordailua, kontserbazio gune izateaz gain, ikaskuntza, ikerketa eta ezagutza transmititzeko lekua ere bada."
Kultura diputatu foralak azpimarratu duenez, ondarea zaintzeak ez du esan nahi soilik objektuak, dokumentuak edo pieza arkeologikoak kontserbatzea. Horrek esan nahi du, halaber, ondare hori bizirik iraungo duela, ulertuko dela eta herritarrekin partekatu ahal izango dela bermatuko duten pertsonak prestatzea. Foru Aldunditik nahi dugu belaunaldi berriek benetako aukerak izatea gure ondarearen kontserbaziorako, ezagutzarako eta transmisiorako funtsezko arloetan prestatzeko.
Beka bakoitzak 10.480 euroko zuzkidura du, 2026 eta 2027 ekitaldietako kargura. Guztira, deialdia 41.920 eurokoa da. Laguntzak Gipuzkoako Foru Aldundiaren 2024-2027 Dirulaguntzen Plan Estrategikoan sartuta daude.
Interesdunek oinarri arautzaileetan ezarritako baldintzak bete beharko dituzte. Horien artean, espezialitate bakoitzarekin lotutako prestakuntza akademikoa egiaztatzea, azken hamar urteetan gutxienez bost urtez Gipuzkoako udalerriren batean administrazio-bizilekua izatea, eta Euskal Autonomia Erkidegoko bi hizkuntza ofizialak ezagutzea eskatzen da, euskararen kasuan PL3 maila edo baliokidea egiaztatuz.
