Tolosaldeko zuzendari Julen Duhauk idatzi eta zuzendutako Eguneroko legez film laburra Bilbon aurkeztuko da laster. Lan honek eskualdeko aktore eta talde tekniko ugari bildu ditu, eta bere estreinaldia apirilaren 20an izango da Bizkaia Aretoan, EHU Kulturaren Udaberri Kulturala zikloaren baitan. Estreinaldiaren ondoren, film laburra Tolosaldean ere erakusteko asmoa dute sortzaileek.

Fikziozko lan honek lau emakumeren eguneroko bizitza du ardatz, lanerako bidean autobus berean elkartzen direnean. Hamar minutuko bidaia horretan, elkarrizketa xumeek, isiluneek eta keinu txikiek esanahi berezia hartzen dute. Filmaren sortzaileek adierazi dutenez, une labur horretan, errutinaren pisua arintzeaz gain, ahizpatasun eta babes espazio bat sortzen da, eguneroko bizitzaren erraietan sortzen diren loturak agerian utziz.

Elkarrizketetan, lan-baldintza prekarioak, zaintza, zahartzea, bakardadea eta genero-desoreka bezalako gaiak jorratzen dira. Hala ere, filmak ez du salaketa zuzenik egiten; aitzitik, eguneroko elkarrizketa naturalen bidez askotan entzuten ez den ahots kolektibo bat azaleratzen du. Grabaketa Tolosako Laskorain ikastolan eta Naparzubiaren inguruan egin zen urtarrilaren 30ean, 31n eta otsailaren 1ean.

Proiektua Leioako campusean Ikus-entzunezko Komunikazioa ikasten ari diren gazteek sortu dute. Hasieran baliabide ekonomikorik ez bazuten ere, EHU Kulturaren beka bati esker aurrera atera ahal izan dute. Sortzaileek eskerrak eman dizkiete proiektua babestu duten tokiko eragile eta komertzioei, hala nola Gozona, Mahala, Insalus, Botarri Jatetxea, Zeu ileapaindegia, Eguzkilore kafetegia, 66 taberna, Kopibat denda eta Laskorain ikastolari, haien ekarpena funtsezkoa izan baita filmaren ekoizpenean.