Ja(ki)tea elkarteak bere hamazazpigarren urteurrena ospatu du zortzigarrenez sariak banatuz, aurten Adunako (Gipuzkoa) Zabala sagardotegian egindako ekitaldian. Hamar saritu izan dira guztira. Horien artean, Mattin Jauregi ARGIAren eta Bizi Baratzearen kolaboratzaileak parte hartzen duen Balerdipeko Erleak proiektuak jaso du bertako ekoizle onenaren saria. Sari nagusia, kalitate eta produktu onenarena, berriz, Beasaingo (Gipuzkoa) Urkiola jatetxearentzat izan da.
Ekitaldiaren aurkezpen lanak Joxe Felipe Auzmendi kazetariak egin ditu. Bertan izan dira, besteak beste, Donostiako Udalaren, Gipuzkoako Foru Aldundiaren eta Eusko Jaurlaritzaren ordezkaritza politikoak. Amaia Barredo, Elikadura, Landa Garapen, Nekazaritza eta Arrantza sailburuak, sari bat emateko aukera izan du.
“"Keak ondo daude, eszenifikazioak ere bai, baina lehen sektoreak laguntza behar du; gero eta frankizia gehiago ari dira irekitzen, eta bertako jatetxeak eta gure sukaldeak ixten."
Xabier Zabaletak, Ja(ki)tea elkarteko eta Donostiako Aratz erretegiko buruak, erakundeen presentzia baliatu du lehen sektorearen aldeko aldarria egiteko, frankizien gorakadaren aurrean bertako jatetxeak ixten ari direla salatuz. Zabaletak nabarmendu du elkartea indartsu dagoela, kide berriak batzen ari baitira, batez ere Ipar Euskal Herrian lanketa eginez.
Aurtengo sarietan, Usurbilgo Bordatxok jaso du Ja(ki)tea elkarteko jatetxearen saria. Paulino Ibargoien negozioaren arduradunak 40 urtetik gora daramatza lanean. Euskararen erabileraren saria Tolosako Biko jatetxearentzat izan da, Itziar Usabiagaren eta Kattalin Bollainen negozioa, non tokiko ekoizleei erosten dieten eta euskara lehenesten duten.
Bertako ekoizle onenaren saria Bedaioko Balerdipeko Erleak proiektuak jaso du, Inaxio Arin eta Mattin Jauregi bazkideek osatua. Jauregik, ARGIAren eta Bizi Baratzearen kolaboratzaileak, bertako produktuak erostera animatu ditu herritarrak. Pintxo tradizional onenaren saria Donostiako Artola tabernako 'Donostiarra' pintxoak jaso du, eta plater tradizional onenarena, berriz, Ziburuko Chez Mattin jatetxeko 'Ttoro' arrain zopak.
Ibilbideari saria hiru jatetxek jaso dute: Donostiako Ganbarako Amaia Ortuzarrek, Leintz Gatzagako Arrateko Begoña eta Belen Plazaolak, eta Hernaniko Irubideko Pili Bereziartuak. Bereziartuak bere jatetxearen itxiera iragarri du, errelebo faltagatik, eta eskerrak eman dizkie bezero, lagun eta senideei.
Karrantzako Casa Garras jatetxeak KM0 saria jaso du, bertako abeltzaintzari egindako ekarpenagatik. Orioko Xixario erretegiko Juan Carlos Beltranek jaso du bertakoto ahaleginaren saria, euskal kulturarekin eta gastronomiarekin maitemindu dela adieraziz. Gastronomia-kazetari saria Pepe Barrenarentzat izan da, eta kalitate eta produktu onenaren saria Beasaingo Urkiola jatetxearentzat, Iñigo Urkiolak jaso duena.
