Urtero bezala, Ordiziak Idiazabal gaztaren denboraldi berria inauguratu du, herriko kaleak bizitasunez betez goizeko 09:00 etatik aurrera. Hainbat ekitaldi eta jarduera antolatu dira, hala nola Azoka berezia, gaztaren aurkezpen ofiziala eta artaldeen zeharkaldia, herritarren eta bisitarien arreta erakarriz.

Aurtengo edizioan, 1.500 ardi inguruk zeharkatu dute Ordiziako Plaza Nagusia eta Alde Zaharra, hiru artaldetan banatuta, ikuskizun tradizionala eskainiz. Artaldeen zeharkaldiaren ondoren, udaletxeko batzar aretoan egin da Idiazabal gaztaren denboraldi berriaren aurkezpen ofiziala.

32. edizio honetan, Hondarribiko Alameda jatetxeko Gorka Txapartegi sukaldari ospetsuak izan du gazta berria ebakitzeko ohorea, bere anaiak, Mikel eta Kepa Txapartegi, eta Alameda proiektuko kideak ondoan zituela. Ekitaldian, Idiazabal Jatorri Izendapenaren Kontseilu Arautzaileak omenaldia egin dio Jose Ramon Agiriano ostalari eta gastronomoari, Idiazabal gaztaren sustapenean egindako lan eskergagatik.

Sarien banaketari dagokionez, Segurako Ondarreko Eneko Goiburu artzainak jaso du Artzain gazta kategoriako Erregulartasun-kalitate saria, eta Olaztiko (Nafarroa) ‘Quesos La Vasco Navarrak’ gaztandegien kategoriakoa. Sari banaketaren aurretik, Ordiziako alkate Adur Ezenarrok eta Eusko Jaurlaritzako hainbat sailburuk artzainen lana goraipatu dute, euskal tradizioaren eta izaeraren funtsezko zati gisa.

Gainera, Ordiziako alkateak jakinarazi du gaztandegi berri bat eraikitzeko proiektua martxan dagoela, datorren urterako prest egotea espero dena. Bertan, bisitariek Idiazabal gaztaren ekoizpen-prozesua gertutik ezagutzeko aukera izango dute. Ekitaldi nagusiez gain, ile-mozte erakustaldia, gazta egitea eta mamia dastatzeko aukera izan da Garagartza plazan, baita arkume pintxoen salmenta ere, eguraldi onak lagunduta.