Txapelketa hau martxoaren 7an hasi zen Elgoibarren eta larunbatetan jokatzen da. UDA Hirutxirlo taldearekin batera, beste hainbat taldek hartzen dute parte, hala nola Elgoibarko San Migel, Elgeta, Lastur, Soraluzeko Ezozi eta San Andres, Bergarako San Joxepe, Azkoitiko Floreaga eta Eibarko Asola-Berri.
Sailkapenari dagokionez, UDAko Gorka Madinabeitia da buru, 19 punturekin eta 7 bola sartuta. Haren atzetik Eibarko Enara Montiel dago, 18 punturekin. Bikoteka, Madinabeitia eta Eñaut Kortabarria bigarren postuan daude une honetan.
Txapelketa nagusi honekin batera, beste lehiaketa bat ere abian jarri da. Hau ostiral gauetan jokatzen da, 23:00etan, hurrengo egunean Hiru Txirlo tiraldiak izango diren bolatoki batzuetan. Aretxabaletako bolatokia ere zirkuitu honetara batu da, eta bertan izango da hurrengo tiraldia apirilaren 10ean.
