Bilboko Euskalduna Jauregian, urriaren 22an, 2026an, ospatuko den lehen edizio honek ingeniaritzaren eta industriaren arloan talentua, bikaintasuna eta Euskadiren garapenerako egindako ekarpenak nabarmendu nahi ditu. Gala hau sektoreko profesional, enpresa eta eragileen topagune izango da, 18:00etatik 22:00etara.
Hiru sari banatuko dira lehen edizio honetan: Ingeniari edo Ingeniera Urtekoa, ibilbide profesional nabarmena eta gizartearen eta lanbidearen garapenerako egindako ekarpena aintzatesteko; Ingeniaritza Proiektu Onenaren Saria, kalitate, berrikuntza, iraunkortasun eta balio-ekarpenagatik proiektuak nabarmentzeko; eta Ingeniaritzako Talentu Berriaren Saria, ekimen berritzaileak eta gazte profesionalen zein startup-en talentua ezagutzeko.
Gala hau etorkizunari begiratzeko gune bat ere izango da. Arabako, Bizkaiko eta Gipuzkoako Industria Ingeniarien Elkargoek hiru erreferentziazko ahots bilduko dituzte Bilbon, enpresa, teknologia eta akademia arloetakoak, datozen erronka handiei aurre egiteko. "Ingeniaritza etorkizunaren aurrean: IA, industria eta talentua erronka berriei aurre egiteko" izenburupean, adimen artifizialak, industria-transformazioak eta talentuaren bilakaerak nola birdefinitzen ari diren eztabaidatuko da.
Mahaian parte hartuko dute Alexander Artetxe (Artecheko presidentea eta kontseilari delegatua), Jesús Valero (TECNALIA Research & Innovationeko zuzendari nagusia) eta Naiara Ortega (EHUko Ingeniaritza Mekanikoko katedraduna). Aloña Velasco, Cadena SER Euskadiko kazetari eta galaren aurkezleak moderatuko du elkarrizketa.
Ekitaldiaren egitaraua honakoa izango da: 18:00etan ate irekiera, 18:30ean galaren hasiera eta ongietorria, 18:40an irekiera instituzionala, 18:45ean sari-banaketa, 19:25ean ponentzia berezia, 20:00etan itxiera, eta 20:00etatik 22:00etara koktel eta networking saioa. Jardunaldiak talentua eta esperientziak aitortzeko aukera emango du, baita profesional, enpresa eta erakundeen arteko topagune bat sortzeko ere.
Asistentzia doakoa da, baina lekua mugatua denez, aurrez izena ematea beharrezkoa da Ingeniariak-en webgunean. Ekitaldia Grupo CajaIngenieros, Diputación Foral de Bizkaia eta Grupo SPRI-ren babesarekin egiten da.
