Aurten, Donostiako Aste Nagusia k naturarekin eta astronomiarekin lotutako eduki berezia eskainiko du. Jon Insausti alkateak iragarri duenez, lehen aldiz, Gladys Enea, Aiete, Ametzagaina, Urgull eta Ulia parkeak programazio ofizialaren parte izango dira. Gainera, abuztuaren 12an izango den eklipse astronomiko paregabeaz gozatzeko aukera izango da, Saguesen pantaila erraldoi bat jarriko baita horretarako, eta umeek "astronauta pasaportea" eskuratu ahal izango dute.
Berritasun gehiago ere izango ditu aurtengo ekitaldiak. Kursaaleko terrazan, abuztuaren 10etik 13ra bitartean, "Arratsaldea dantzatzen da!" jarduera antolatuko da, zuzeneko musikaz girotutako dantzaldiak eskainiz. Abuztuaren 10ean, "Guretara" ekimenak XX. mendeko 20ko hamarkadako Donostiako udaldietara eramango ditu parte hartzaileak. Horrez gain, lehen aldiz, "kokotxak pil-pilean" prestatzeko lehiaketa egingo da.
Urteroko erraldoi eta buruhandiak ere ez dira faltako hiriko kaleetan, baita Trinitate plazako herri kirolak ere. Kirol eskaintza zabala izango da, besteak beste, Zurriola, Antigua, Nautiko eta Urumea inguruetan. Gainera, lau egunez, zaratarik gabeko egunak izango dira Paseo Berriko eta Gipuzkoa plazako barraketan, pertsona guztiek gozatu ahal izateko. Abuztuaren 15ean, Pirotecnia Valcearen 150. urteurrena ospatzeko, ikuskizun "piromusikal" berezia izango da.
Bestalde, ikuskizun eta ekitaldietako langileek greba deitu dute abuztuaren 14rako, hitzarmen duin baten alde. Donostiako Piratek beraien kontzertuak bertan behera utzi dituzte grebarekin bat egiteko. Udalak greba errespetatuko duela adierazi du, eta Jon Insausti alkateak azpimarratu du "kultura zaintzeko eta babesteko modurik onena kultura programatzea" dela, betiere "ahula den sektore bat zaintzea" helburu duela udalaren premisa.
Alkateak baieztatu du abuztuaren 14ko programazioa mantentzeko asmoa dutela, eta eguna iristean "zer egin egitarauari eusteko" ikusiko dutela.
