Kutxa Fundazioak bihar erabakiko du Miramongo Eureka! Zientzia Museoaren etorkizuna. Duela bi aste iragarri zen bezala, museoa ekainaren 30ean behin betiko ixteko asmoa dago. Egoera honen aurrean, Jon Insausti Donostiako alkateak gutun bat igorri dio fundazioaren patronatuari, udalaren izenean, itxiera “birpentsatzeko” eskatuz.
“"Gure egitekoa bada donostiarren kezkak entzutea, eta donostiarrak ez daudela ados Eureka! zientzia museoa ixtearekin. Guk eskatzen duguna da alternatiba sendo bat egon arte, Eureka zabalik mantentzea. Donostia zientziaren hiria delako. Museoak zabalik jarraitu behar du, jendea zientziara hurbiltzeko eta dibulgazio horretan jarraitzeko."
Insaustik adierazi duenez, herritarrek ez dute bat egiten museoaren itxierarekin, eta Donostiak zientziaren, ezagutzaren eta berrikuntzaren hiria izaten jarraitu nahi badu, ezinbestekoa da dibulgaziorako horrelako espazioak izatea. Horregatik, Eureka! zabalik mantentzearen garrantzia azpimarratu du.
“"Zalantzarik ez dut Kutxa fundazioak erabakirik onena hartuko duela, betidanik erakutsi dute gure gizartean barneratuta daudela."
Alkateak konfiantza agertu du Kutxa Fundazioak erabakirik onena hartuko duela, gizartean beti erakutsi duen inplikazioa kontuan hartuta.
