Zerbitzu honen bidez, Azpeitiko erdigunera joan-etorriak erraztu nahi dira, tarifa murriztuan. Onuradunek 3 euro ordaindu behar dituzte bidaia bakoitzeko, eta pertsona bat baino gehiagok taxia partekatzen badute, bakoitzak 1,50 euro ordainduko du. Txartela eskuratu nahi dutenek edo dagoeneko dutenek eta berritu nahi dutenek izapideak egin ditzakete Udaletxeko Herritarren Arreta Zerbitzuan edo udalaren webgunean.

Auzo-taxi zerbitzua Aratzerrekan, Eizagirren, Elosiagan, Izarraitzen, Loiolan, Nuarben, Matxinbentan, Odrian, Oñatzen, Oñazbidean eta Urrestillan erroldatutako bizilagunei zuzenduta dago. Horrez gain, toki horietan zaintza lanetan aritzen diren herritarrek ere erabili dezakete. Zerbitzuak Azpeitiko taxi-lizentzia duten eta Azpeitiko Udalarekin hitzarmena sinatu duten taxilariekin egiten diren bidaiak diruz laguntzen ditu.

Diruz lagundutako bidaien ordutegia honako hau da: astelehenetik ostiralera, 07:30etik 20:30era, eta larunbatetan, 09:00etatik 20:30era. Garrantzitsua da jakitea igande eta jaiegunetan egindako joan-etorriak ez direla diruz laguntzen, ezta abuztuan egindakoak ere. Neurri honek udalerriko mugikortasuna hobetzea du helburu, batez ere auzo urrunenetako bizilagunentzat.