Alde Zaharreko Gazte Asanbladak (AZGA) Urgulleko Guardetxea okupatu zuenetik urtebete bete da, 2025eko Maiatzaren Lehenaren testuinguruan. Urteurren honen harira, Guardetxeko kideek agerraldi publikoa egin zuten Parte Zaharreko Trinitate plazan, Donostiako hainbat eragile sozial eta politikoen babesarekin.
“"Gaurko eguna ordea, ez da urteurren ospakizunetarako eguna. Maiatzaren Lehena antolakuntza politikoan eta zapalkuntza ororen kontrako borrokan berresteko eguna da."
Agerraldian, Guardetxeak eta bere urteurrenak Donostiako eragile eta militanteen arteko aliantzak indartzeko eta “bestelako Donostia baten eraikuntzan aurrera pausu bat emateko” balio behar dutela adierazi zuten. Hainbat eragilek bat egin zuten aldarrikapen honekin, besteak beste, Askapena Donostia, Bilgune Feminista, Donostiako Piratak, Ernai Donostia, ESK Sindikatua, ELA Sindikatua eta LAB Sindikatua.
Urtebete honetan, Guardetxeak eskaintza politiko-kultural etengabea garatu du, milaka pertsona igaro dira bertatik eta dozenaka eragileren egitasmoak garatzeko aterpea izan da. Horregatik, proiektu autogestionatu eta komunitarioak ezinbestekoak direla azpimarratu dute.
Berriki, elkartea osatu eta Donostiako Udalari eraikina modu legalean kudeatzeko eskaera ofiziala egin diote. Agerraldian adierazi zutenez, udalak “bi aukera” ditu: “dagokion erantzukizuna bere gain hartzea eta Guardetxearen esleipen baldintzak adostea, edo beste behin ere, Parte Zaharreko eta Donostiako elkarte, eragile eta bizilagunen aldarrikapenei entzungor egitea eta Guardetxea husten saiatzea”.
Era berean, udalbatzarrera joateagatik jasotako 32.000 euroko isunak salatu zituzten, eta zigor eskaeren zein epaiketa egunaren zain dauden kideei elkartasuna adierazi zieten.
