Amillubi proiektuak Udaberriko III. Festa antolatu du maiatzaren 16rako, Gipuzkoako Zestoa herriko Iraeta auzoan. Ekitaldiak goizean zehar bi mahai-inguru nagusi izango ditu, esperientzia kolektiboak eta ekoizpen agroekologikoa ardatz hartuta.
Lehen mahai-inguruak, “Ametsek lurra hartzen dutenean” izenburupean, amets kolektiboetatik praktikara igaro diren proiektuak bilduko ditu, hala nola Lakabe, Ametxe eta Aginaga Biziberritzen. Amillubi proiektuko kideek adierazi dutenez, mahai-inguru honek gogoetarako balioko du, esperientzia horien arrakastetatik eta erronketatik ikasteko helburuarekin.
Bigarren mahai-ingurua, “Lur bizia, herri bizia” izenekoa, 12:00etan hasiko da eta ekoizpen proiektu kolektiboetan zentratuko da, besteak beste, Aleka, Errigora eta Etartie. Mahai-inguru honek elikadura burujabetza, auzolana eta ekoizpen eta kontsumo eredu alternatiboak aztertuko ditu, Amillubi proiektuaren etorkizuneko hausnarketarekin lotuta.
“"Hiru esperientzia hauek, guretik desberdinak izan arren, badute ezaugarri komun bat: pertsona talde txiki baten amets gisa sortu ziren, eta gaur egun ibilbide oparoa egina dute. Haien esperientzietatik ikasi nahi dugu, bai asmatu dutenetik, bai bidean izandako erronketatik."
Mahai-inguruen ondoren, herri bazkaria egingo da 14:30ean, bertako produktuekin osatua. Arratsaldean, kultur ekitaldi anitzak izango dira, besteak beste, PObrESIAK hitz esanen emanaldia Aimar Uribesalgok, Eli eta Manex Pagolak bertsoak eta musika elektronikoa uztartuz, Babarrunba taldearen euskal kanta herrikoiak runba doinuan, eta Ainhoa eta Gorane DJen Txantona Garrote emanaldia.
Biolur elkartea, laborantza ekologikoaren aldekoa, da Amillubi proiektuaren sustatzailea. Gaur egun, Amilibia baserria eta bere lurrak kolektiboki erosteko azken fasean daude, eta etorkizuneko proiektuak definitzen ari dira “Utopiak eraikitzen” izeneko prozesu kolektibo baten bidez.
