Udala herritarren beharrak, ideiak eta proposamenak ezagutu nahi ditu Otazu Jauregiaren balizko erabileren inguruan. Elkarteekin eta administrazio batzordeekin egindako bileren ostean, prozesua herritar guztiei ireki zaie.
Lehenengo saio irekia larunbatean, urriaren 24an, 10:00etan hasiko da, Otazu Jauregian (Zurbano). Jardunaldia jauregiaren barrualdea bisitatuz hasiko da, bere espazioak, ezaugarriak eta aukerak ezagutzeko.
Ondoren, talde lanetan arituko dira ideiak sortzeko, beharrak identifikatzeko eta eraikinaren balizko erabileren inguruko proposamenak biltzeko. Helburua da auzokideen iritziak eta beharrak jasotzea, eta eraikinaren etorkizunerako alternatibak aztertzea.
Herritarrek prozesuan hitza izatea eta euren ekarpenek udala eraikinaren erabilera aukerak baloratzen laguntzea nahi du udalak. Parte hartu nahi dutenek, urriaren 14a baino lehen, beren izen-abizenak bidali behar dituzte beren herriko Batzar Administratibora, whatsapp edo posta elektroniko bidez.
