Aurtengo ekitaldiak, inoizko alaien bilakatu denak, Gerra Zibilean eta ondorengo urte zailetan jaiotako 26 zumaiar omendu ditu. Hauek eguerdian elkartu dira Zumaiako Udalean, herriko jubilatuen elkartearekin batera, aitortza xume bat jasotzeko.

Iñaki Ostolaza alkateak gogorarazi die jaiotako garaia, 1936an hasitako Espainiako Gerra eta ondorengo frankismoaren zailtasunak. "Larre motzean" hazitakoak direla eta askok erbestera jo behar izan zutela aipatu du, baita zenbaitek Zumaiara bizitzaren alde etorri zirela ere. Horregatik, alkateak azpimarratu du belaunaldi berriei historia hori azaltzeko duten aukera baliatu behar dela, "zuen garaian gertatutakoa errepika ez dadin, berriro ez dadin xenofobia gailendu".

Omenaldia, hala ere, jaiotako urte ilunak gorabehera, oso alai izan da. Omenduak Reuma musika talde berriaren kalejirak lagunduta iritsi dira ekitaldira, eta taldeak Ikusi mendizaleak jo duen bitartean sartu dira banan-banan, irribarre zabala aurpegian.

Jubilatuen elkarteko ordezkari batek ere hitza hartu du ekitaldian. Ondoren, beti bezala, omenduek lore sorta eta oparitxo bana jaso dituzte. Musika saio batekin eta hamaiketakoarekin amaitu da aurtengo ekitaldia.