Zaldibarko Aldatsa goitibehera taldeak elkartea desegitea erabaki du, eta horrela, bost urteko ibilbideari amaiera eman dio. Talde txiki bat izan dela adierazi du Eneko Iraetak, taldeko kide batek, eta azken bi urteetan zailtasunak izan dituztela beren jardunari eusteko. Kideen egunerokotasuna eta beste konpromiso batzuk direla eta, ezin izan diote elkarteari behar adina denbora eskaini.
Elkartea 2021ean jaio zen, garai bateko goitibehera jaitsierak berreskuratzeko helburuarekin. Txosnaguneko ekintza izan zen urte luzez, eta antolatzaileei galdetuz ikasi zuten nola egin. Urtero antolatu dituzte lasterketak, besteak beste, Zaldibarko goitibehera jaitsiera, Euskal Inertzia Kopako probetako bat izan dena. Iraetak eskerrak eman dizkie taldea bultzatzen lagundu duten herritarrei eta boluntarioei.
Inertzia kirolen sasoiari dagokionez, kontuak "boladak" izaten dituela aitortu du Iraetak. Duela bizpahiru urte gorakada bat izan bazen ere, jaitsiera bat bizi izan dutela dio orain, baina beste leku batzuetan, hala nola Busturialdean, indarra hartzen ari dela nabarmendu du, belaunaldi berriak sartu baitira.
Aldatsa elkarteko kideek beraien material guztia dohaintzan eman diote Berbaro euskara elkarteari, udalekuetan eta aisialdiko ekintzetan erabiltzeko.
