Errekalde auzoan larunbatean ospatuko den herri-bazkarirako txartelak salgai daude jada. Erosketak Iratxo goxo-dendan zein Asigorren egin daitezke. Aurten, menu berezia eskainiko dute: helduentzat paella, okela-bolak, pantxineta eta kafea 17 euroren truke, eta umeentzat makarroiak, okela-bolak eta jogurta 12 eurotan.
Mesedeetako Jai Batzordetik herritar guztiak gonbidatu dituzte bazkarira, bai bertakoak zein kanpokoak. "Kale-kaleko jende asko etortzen da, familia errepikatzaile asko daude. Gurean denak dira ongietorriak", adierazi dute.
Menu gozoaz gain, ekitaldiak familia-giroan ospatzeko, umeentzako puzgarriak eta jolasak antolatu dituzte. Puzgarriak 11:00etan hasiko dira. Bazkalostean, Kukumixo-ren eskutik, umeek jolaserako aukera izango dute, merendola ere barne. Ondoren, 17:00etan, 3X3 futbito txapelketa jokatuko da, 2014-2015 eta 2016-2017 urteetan jaiotakoentzat zuzenduta.
Helduagoendako, eguerdian toka txapelketa izango da, eta bazkalostean, berriz, tute txapelketa eta futbolin txapelketa. Parte hartzeko 10 euro ordaindu beharko da bikoteko, eta sariak honakoak izango dira: bikoteari Edurtzan bazkaria, 60 euroko otarra, 40 euroko otarra eta txosnan bi trago.
Iluntzea borobiltzeko, zezen-mekanikoan ibiltzeko aukera ere izango da.
