Disko berri honek bederatzi abesti biltzen ditu, eta horietan Markezek “umorea eta ironia” baliatzen ditu gaur egungo gizartean kezka sortzen duten gaien inguruko hausnarketak proposatzeko. Horretarako, bederatzi bertso-doinu sortu ditu, eta bertso-sortak jaso ditu hainbat bertsolariren eskutik, besteak beste, Ane Labaka, Alaia Martin, Andoni Egaña, Beñat Gaztelumendi, Jon Maia, Jon Sarasua, Oihana Arana, Odei Barroso eta Xabier Amuriza.
Soinuaren arloan, Arkaitz Miner, Iker Lauroba eta Iñigo Mantzizidor musikariekin lan egin du, eta ahotsak Esti Markez, Maddalen Arzallus, Xabi Sukia eta Eneritz Aulestia abeslariek jarri dituzte. Markezek adierazi duenez, diskoaren sorkuntza-prozesuaz gozatu du, bertso-sorta bakoitzak eskakizun ezberdinak zituelako, eta horrek lanaren aberastasuna ekarri du.
“"Bertso-sorta bakoitzarekin ezberdina izan da, bakoitzak zerbait ezberdina eskatzen zuelako, hain justu. Orokorrean, lehenengo, gaia eta metrika adosten genituen, eta orduan hasten ginen lanean, bertsolaria bere aldetik eta ni nire aldetik. Erdibidera heldutakoan, lana orrazten genuen; batzuetan doinua bere horretan gelditu da, baina beste kasu batzuetan moldatu egin behar izan ditut doinuak."
Diskoaren aurkezpen-kontzertuak “oso ondo” joan direla eta “bereziak” izaten ari direla azpimarratu du Markezek. Kontzertu bakoitzean bertsolari gonbidatu bat izaten da, saioari nortasuna eta bakartasuna emanez. Eskoriatzako emanaldian, Oihana Arana bertsolariak parte hartuko du, eta hark idatzitako sortaren inguruko azalpenak emango ditu. Markezek adierazi duenez, Aranaren lana ezagutzen zuen arren, ez zuten elkar ezagutzen, baina gazteen eta etorkizunaren inguruko hausnarketa bat egiteko pertsona egokiena zela iruditu zitzaion.
