Aurten ere, Mañariako kale eta gune desberdinak kulturaz beteko dira ‘Maiatza Kulturala’ ekimenaren eskutik. Antzerkia, kontzertuak, hitzaldiak, ikuskizunak eta azoka izango dira, besteak beste, herriko bizitza kulturala aberasteko. Ekimen honen helburu nagusia herritarren artean kultura sustatzea, sorkuntza artistikoa balioan jartzea eta adin guztietako publikoarentzat aisialdi eskaintza anitza eskaintzea da. Mañariko Udala eta herriko elkarte eta eragile desberdinen arteko elkarlanari esker osatu da egitaraua.

Egitarauaren barruan, Andra Mari dantza taldeak bere 40. urteurrena ospatuko du maiatzaren 23an. Egun osoko ospakizuna izango da, non gaur egungo dantza taldeek (txikienetatik nagusienetaraino) eta taldean ibilitako dantzari ohiek parte hartuko duten, 80 urtetik gorako dantzariak barne. Eguna kalejira batekin hasiko da, eta ondoren, frontoian dantza saio nagusia eskainiko dute, ezpatadantza eta gorulariak bezalako dantza tradizionalekin. Gainera, taldearen sorreran eta ibilbidean garrantzitsuak izan diren pertsonak omenduko dituzte. Eguna borobiltzeko, 18:00etan, Lorratz taldeak erromeria eskainiko du plazan.

Bestalde, maiatzaren 16an, Arri ekimenaren barruan, formatu txikiko pieza artistikoak ikusi ahal izango dira herriko gune desberdinetan. Korrala Sormen Gunea arduratu da antolaketa lanaz. Ikusleek ibilbide bat osatu beharko dute pieza guztiak ezagutzeko, antzerki-ginkana moduko esperientzia batean. Ibilbide orria 17:00etan banatuko da plazan, tokiak, orduak eta piezak zehaztuz, une horretara arte sekretuan mantenduko direnak. Ikuskizunen artean, soka finkoa eta clowna uztartzen dituen pieza bat, dantza garaikidea, antzezlan bat, Korrala Sormen Guneko ikasleek sortutako pieza bat, monologo komiko bat eta swingtronics taldearen kontzertua izango dira.

Hilabete osoan zehar, egitaraua hainbat kultur ekimenek osatuko dute. Maiatzaren 9an, ‘Arizona’ antzezlanak mugei, migrazioari eta giza harremanei buruzko gogoeta tragikomikoa proposatuko du. Maiatzaren 17an, Oreka TX taldearen kontzertua izango da, eta maiatzaren 22an, Gar proiektu musikalak zuzenekoa eskainiko du Errekondon. Amaitzeko, maiatzaren 24an, XXX. Euskal Azoka eta IX. Euskadiko Azpi Gorri lehiaketa egingo dira, aurtengo ‘Maiatza Kulturalari’ amaiera emanez.