Orioko arraun taldea denboraldiariurka jarraitzen dio, eta asteburu hau ere hitzorduz betea izango da. Alde batetik, klubeko harrobiko eta beteranoetako arraunlariak Sevillan izango dira gaurtik igandera arte, Espainiako Aulki Mugikorreko Txapelketan parte hartzen. Estatu osoko 62 elkarte eta 372 ontzi bilduko ditu txapelketa honek. Orio Arraunketa Elkarteak hamar ontzi aurkeztuko ditu, sei infantiletan eta lau beteranoetan.
Bestetik, larunbatean Eusko Label eta Euskotren ligetako jardunaldiak jokatuko dituzte. Orioko gizonezkoen eta emakumezkoen ontzi nagusiek XVII. eta VIII. Bilboko Banderen bila arituko dira. Emakumezkoen estropada 17:20an hasiko da, eta gizonezkoena, berriz, 18:15ean. Horrez gain, KAE 1 kategoriako arraunlariek Donibane Zibiruko 34. Estropada jokatuko dute larunbatean, 17:30ean hasita, eta bertan izango da Orio B ontzia.
Asteburua borobiltzeko, Zierbenan (Bizkaia) izango dute hurrengo hitzordua, non Eusko Label eta Euskotren ligetako jardunaldiak jokatuko diren. Emakumezkoen txanda 11:25ean hasiko da, eta gizonezkoena, 12:20 aldera. Igandean, berriz, Zarautzen jokatuko dituzte erlojupeko estropadak KAE 1eko gizonek zein ETE ligako emakumeek, 11:30ean eta 12:30ean, hurrenez hurren.
