Arrate egunaren bezperan hasi ziren jaiak, Jaixak Herrixak Herrixandako jai batzordeak antolatutako egitarauarekin. Lehenengo ekitaldia herri-bazkaria izan zen.
Arratsaldean, txosnak zabaldu ondoren, Elektrotxufla elektrotxarangak girotu zituen zelaia eta inguruak. Ia aldi berean, Arrateko santutegian Salbea ospatu zen.
Ondoren, herri-kirolen erakustaldi bikaina eskaini zuten aizkolari eta harrijasotzaileek. Bestalde, Tiro Pitxoi jatetxean, Andoni Egaña, Maddi Ane Txoperena, Saioa Alkaiza eta Aitor Mendiluze bertsolariek saio biribila egin zuten, …eta kitto! Euskara Elkarteak antolatutako bertso afarian.
Gauean, musika izan zen protagonista nagusia. Soba kolektiboaren eskutik egindako “Zelaian” saioarekin hasi zen emanaldia, eta ondoren, Maruxa eta Bad Sound DJ Set taldeen kontzertuek girotu zuten gaua.
