Gipuzkoako Foru Aldundiak bat egin du aurten ere Artxiboen Nazioarteko Astearekin, eta horren harira, ate irekien jardunaldiak antolatu ditu bere bi artxibo historikoetan: Tolosako Gipuzkoako Artxibo Orokorra eta Oñatiko Gipuzkoako Probintziako Artxibo Historikoa.
Tolosako artxiboa ekainaren 11n eta 12an bisitatu ahalko da, doan eta aurrez izena emanda. Guztira sei bisita gidatu eskainiko dira: ekainaren 11n lau (12:00etan eta 17:30ean euskaraz, eta 10:00etan eta 16:00etan gaztelaniaz), eta ekainaren 12rako bi (10:00etan euskaraz eta 12:00etan gaztelaniaz). Bisita hauek ordu eta erdiko iraupena izango dute, eta gutxienez bost eta gehienez hamabost pertsonako taldeetan egingo dira.
Izena emateko, 943 41 52 62 telefono zenbakira deitu daiteke 08:30etik 14:30era, agg-gao@gipuzkoa.eus helbidera idatzi, edo izena emateko inprimakia bete.
Artxiboen Nazioarteko Kontseiluak sustatzen duen Artxiboen Nazioarteko Astea ekainaren 8tik 12ra ospatuko da aurten, Artxiboak justiziarako: eskubideak, memoria eta etorkizuna lelopean. Edizio honetan, artxiboek eskubideak defendatzeko, memoria kolektiboa zaintzeko eta gizarte demokratikoak sendotzeko duten eginkizun funtsezkoan jarriko da arreta.
“"Artxiboak, dokumentuen gordailu izateaz gain, nor garen eta honaino nola iritsi garen ulertzeko lekuak ere badira. Horregatik, azpimarratu du artxiboak herritarrei zabaltzea dela memoria publikoa guztiona izateko modu bat, eta ez soilik non bilatu badakitenena. Desinformazioa erraz zabaltzen den garaiotan, artxiboek urria den zerbait eskaintzen dute: dokumentuak, datak, egitateak. Hori ere ondasun publikoa da."
Bisita gidatuen bidez, artxiboen eguneroko funtzionamendua ezagutu eta jendearentzat normalean irekita ez dauden espazioak ezagutzeko aukera izango da, hala nola dokumentu biltegiak, lan gelak edo zaharberritze laborategiak. Horrez gain, XV. mendetik XX. mendera bitarteko jatorrizko dokumentuak erakutsiko dira, eta Oñatiko artxiboan, bereziki, justiziarekin eta eskubide urraketekin lotutako materiala azpimarratuko da.
