Mertxe Salaberri eszena-zuzendariak adierazi duenez, Kantuz Lirika Elkartearen sorreraren helburua "berritzea" da. "Asmoa da aurtengo zarzuela emanaldian jendeak ikustea aro berri baten hasiera dela; bestelako ikuskizun bat prestatzea", azaldu du. Taldea osatzen duten 45 kideak entseguetan murgilduta dabiltza, azaroko azken astebururako prestaketekin.
Elkarteak azaldu duenez, izen berriek proiektu berriei ekiteko eta zabaltzeko garaia islatu nahi dute, urteetan eraikitako ibilbidea eta esentzia mantenduz. Etapa berri honekin batera, irudi berritua, logotipo berria eta errepertorioaren bilakaera ere iritsiko dira, genero lirikoa publikoari hurbiltzen jarraitzeko.
Federico Chueca ren El año pasado por agua aukeratu du Kantuz-ek etapa berri honi hasiera emateko, Ricardo de la Vega ren libretoarekin. Proposamen honek musika bikaina, izaera alaia eta kutsu parte-hartzailea ditu, eta taldearen ohiko errepertorioan berrikuntza dakar.
Cristina Cubillo k zuzenduko du musika, eta Mertxe Salaberri k eszena-zuzendaritza hartuko du bere gain. "Zarzuelak ez du agur esaten; berritu egiten da", adierazi dute, eta hori agertokian erakusteko modurik onena dela gaineratu dute. Kantuz-ek Arrasateko kultura egutegian zarzuela hitzordu garrantzitsu bihurtu duen ekimenaren lekukoa hartu eta aurrera begiratzen du, ideia berriekin eta kide berriekin hazteko borondatearekin.
Elkarteak publikoarekiko lotura estutu nahi du etapa berri honetan. "Publikoaren leialtasuna, maitasuna eta urtez urte Amaia Antzokian izandako presentzia ezinbestekoak izan dira ibilbide hau posible egiteko", gogorarazi dute. Hasiera berri hau bereziki eskaini nahi diete zarzuela bidelagun izan dutenei eta lehen aldiz hurbilduko direnei.
