Irene Arrarats, Euskaltzaindiako kide berria, bere sarrera hitzaldia eskainiko du ekainaren 20an, larunbatean, Hernaniko udaletxeko osoko bilkuren aretoan. Akademiak jakinarazi duenez, hizkuntzalariak kazetaritzako hizkeraren eta hizkuntzaren manipulazio ideologikoaren inguruan arituko da.
Ekitaldia 11:30ean hasiko da. Hasieran, Joxan Goikoetxea musikariak 'Haize hegoa' interpretatuko du. Ondoren, Andres Urrutia euskaltzainburuak eta Xabier Lertxundi Hernaniko alkateak ongietorria egingo dute. Miren Agur Meabe Akademiako idazkariak eta Erramun Osa idazkariordeak ere hitz egingo dute, eta ondoren, Arraratsek 'Hitzak haizean, hitzak erauntsietan' izenburuko hitzaldia irakurriko du.
Hitzaldiaren lehen zatian, Arraratsek kazetaritzako hizkeraren eragina hizkuntzan eta hizkera horretan islatzen den bilakaera aztertuko du. Euskara estandarraren probalekuetako bat diren eguneroko prentsa eta estilo liburuen garrantzia nabarmenduko du normalizazioan, eta Euskaltzaindiaren eta komunikabideen arteko elkarlana azpimarratuko du araugintza gizarteratzeko.
Bigarren zatian, hizkuntzaren manipulazio ideologikoaz eta propagandaz jardungo du. Ondoren, Miriam Urkia Euskaltzaindiaren Gipuzkoako ordezkariak erantzungo dio Arraratseri. Azkenik, euskaltzain berriak karguaren zina egingo du eta Andres Urrutia euskaltzainburuaren eskutik domina, diploma eta ikurra jasoko ditu.
Irene Arrarats Lizeaga (Hernani, 1967) Geografia eta Historia lizentziaduna da. Euskaldunon Egunkarian (1991-2003) eta ondoren Berrian (2003tik aurrera) lan egin du, estilo zuzentzaile, itzultzaile eta euskara arduradun gisa. Egunkariaren estilo liburuaren egileetako bat da, eta Berriako estilo liburuaren zuzendaria da.
Euskaltzaindian 2007tik parte hartzen du hainbat batzordetan, hala nola Hiztegi Batuko lantaldean, Exonomastika batzordean, Euskaltzaindiaren Hiztegia lantaldean eta Euskara Batuaren Eskuliburuaren Batzordean. Bere helburua betidanik izan da euskal prentsaren eta Euskaltzaindiaren artean zubi-lana egitea.
