Bihar hasiko dira Elizkaleko Korputz Jaiak, eta ohiturari jarraiki, Erretz Txapelketa jokatuko dute atariko gisa. Ekitaldia Xiriako kafetegian izango da, 17:00etan hasita, eta izen-ematea bertan egin beharko da.

Ostegunean, ekainaren 11n, hasiko dira jaiak Elizkalean bertan, 18:00etan txupinazoarekin. Jarraian, musika eskolako gaztetxoek kalejira egingo dute, eta ondoren buruhandiak ibiliko dira. 19:00etan, meza emango da hil diren kaleko bizilagunen omenez. Gauean, 20:00etatik aurrera, Andoni Ollokiegik emanaldia eskainiko du Mendizale tabernaren atarian.

Ostiralean, ekainaren 12an, Juan Antxieta musika eskolako gaztetxoek kalejira egingo dute 18:00etan, eta haiei Kantu Jirakoek hartuko diete erreleboa 19:00etan. Iluntzean, 20:30etik aurrera, Porru DJ musikariaren txanda izango da.

Larunbatean, ekainaren 28an, izango da festa egun handia Elizkalekoentzat. Eguerdian hasiko da festa, Itsasi taldeko dantzariekin. Arratsaldean, trikitilarien laguntzarekin kalejira egingo dute herritarrek. 20:00etan, lagunarteko afaria egingo dute Main tabernan; aurrez izena eman beharko da bertan. 20:30etik aurrera, Imuntzo eta Beloki taldeek girotuko dute festa, eta gauerdian zozketako zenbaki sariduna aterako dute.