Durangoko jaiak hasiera emateko, Pantxikere eta Broken Brothers Brass Band taldeak Durangoko kaleak zeharkatuko dituzte. Ondoren, Intxaurre elkarteko kideek hartuko dute txapligua pizteko ardura, aurten 40 urteko ibilbidea ospatzen baitu. Elkarte honek erreferentziazko lekua izaten jakin du oztopoen gainetik.
Egitarauak ohiko hitzorduak biltzen ditu, hala nola paella txapelketa, Mañaria errekako jaitsiera, Gazte Eguna, Etxera Eguna eta mozorro eguna, azken honek Durangaldeko fauna eta flora gai nagusitzat hartuta. Gainera, ekitaldi berriak ere izango dira, tartean, Maritxu Hankatxu eta Igurtzi Serrano drag artisten ikuskizuna, bermut-edan goiztiarra eta artisautza azoka, non Euskal Herriko hainbat sortzaile bilduko diren.
Txosna batzordeak azpimarratu du urte osoko lana egiten dutela, ez soilik txosnetarako. Olatz Gorritxategi eta Jone Gutierrez bozeramaileek adierazi dutenez, eragileek euskararen, feminismoaren, sozialismoaren, gizarte inklusioaren, kirolaren eta eskubide sozialen zein politikoen alde lan egiten dute etengabe.
Erasoen kontrako protokoloa martxan egongo dela gogorarazi dute, eta herritar guztiak, durangarrak zein ez, gazteak zein ez, gonbidatu dituzte txosnetara bertaratzera.
