Jon Insausti Donostiako alkateak eta Ane Oiarbide Ekonomia eta Tokiko Enpleguko zinegotziak aurkeztu zuten ekimena astearte arratsaldean Viktoria Eugenia antzokian. Egitasmoa «elkarrizketa kolektibo handi bat» dela adierazi du Insaustik, «donostiarrek eta donostiarrentzat egindako etorkizuneko prozesua» baita.
Prozesuak zazpi lantalde tematiko izango ditu, «156 pertsona konprometituk» osatutakoak. Hauek dira lantaldeetako kideak: zerbitzari publikoak, auzoetan inplikatutako herritarrak, hainbat sektoretako adituak eta profesionalak, unibertsitateko eta mundu akademikoko erreferenteak eta Donostiako erreferente berriak.
Zazpi gai nagusi jorratuko dituzte lantaldeek: etxebizitza irisgarria auzo bizietan; hurbileko hiria eta funtsezko azpiegiturak; ekonomia indartsua, berritzailea eta ezagutzan oinarritua; zainketen eta belaunaldien arteko elkarrizketaren hiria; segurtasuna, bizikidetza eta gizarte kohesioa; kultura, identitatea eta nazioarteko posizionamendua; eta erakundeen konfiantza eta aliantza estrategikoak.
Egitasmoaren izenaren inguruan, Insaustik Eneko Goia alkate ohiak sarri erabilitako «topera» hitza nabarmendu du. Hitz honek bi kontzeptu batzen ditu haren esanetan: alde batetik, hiria munduko leku onenen artean kokatzeko asmoa (Top), eta bestetik, etorkizunera begira anbizioz pentsatzera gonbidatzen duen aro berri bat (Era).
Egitasmoaren saioak «bihar bertan» hasiko dira eta urte amaierara arte luzatuko dira. Funtzionamendua honakoa izango da: mahai bakoitzak hainbat saio osatuko ditu, diagnostiko bat partekatuz, eztabaidak garatuz eta ondorioak ateraz. Dokumentazio guztia eskuragarri egongo da webgunean, parte hartu nahi dutenentzat. Urte amaieran aurkeztuko dute «elkarrizketa kolektiboaren emaitza».
Mahaiek «donostiarrek garai honetan dituzten erronkei erantzun nahi» diete, alkatearen hitzetan: etxebizitzaren kostua, belaunaldien arteko erronka, zahartzeak sortzen dituen beharrak eta espazio publikoa, bizikidetza eta segurtasunaren zaintza hobetzea.
Insaustik gaineratu duenez, Europako eta munduko beste hiri batzuk ere beren ereduak birpentsatzen ari dira, hala nola Kopenhage (munduko hiririk onena eguneroko bizitzarako), Paris (hamabost minutuko hiria), Bartzelona (hurbileko hiria), Helsinki (hiri funtzional zoriontsuena) eta Munich (hazkunde orekatua).
«Hausnarketa honen benetako protagonista ez da hiria abstraktuan. Donostiarrok gara. Gu gara. Donostiarron Donostia», azpimarratu du alkateak. «Ongizatea eraiki duten hiriek badakite etorkizuna ez dela heredatzen: hamarkada bakoitzean berriro konkistatzen da ideia eta ahots berriak dituen belaunaldi bakoitzeko».
