Durangaldeko kultura eta historia sustatzen duen Gerediaga Elkarteak, Abadiñoko Udalarekin batera, ikerketa sakon bat burutu du. Lan horren emaitza da Gerra Zibilak udalerrian utzitako arrastoak aztertzen dituen liburu bat, Ecos de la guerra de 1936 en Abadiño. Testimonios locales izenburupean. Argitalpen honek, Abadiñon garai horri buruz egindako lehen azterketa sakona da.

Jesús Mari Arruabarrena da obraren egilea, eta proiektu kolektibo baten emaitza da, non ikertzaileek, elkarteek eta herritarrek parte hartu duten. Dokumentu historikoak eta inplikatuen adierazpenak erabiliz, liburuak orain arte pribatuan geratu diren istorioak berreskuratu nahi ditu. Narrazioa gatazkaren aurreko testuinguruaren eta herriko egoera soziopolitikoaren azalpenarekin hasten da, eta ondoren gerrako hainbat pasarte jorratzen ditu. Horrela, bonbardaketak, kartzelaratzeak eta arazketa prozesuak biltzen ditu, artxiboetako datuak lehen pertsonan kontatutako istorioekin uztartuz.

Liburuaren azken atalean, Jimi Jiménez historialariak gerran parte hartu zuten abadiñarren zerrendak osatu ditu. Hauek hainbat kategoriatan sailkatuta agertzen dira, hala nola milizianoak, langile batailoietara behartuak, epaituak, errefuxiatuak eta ebakuatuak, bonbardaketetan hildakoak eta zaurituak, fusilatuak, alde nazionaleko sinpatizatzaileak eta soldaduak, mobilizatutako bizilagunak, industriako langileak eta beste batzuk. Gainera, QR kode baten bidez, haien biografia laburrak kontsultatu daitezke. Informazio bilaketa dokumentazio lan zabalean eta elkarrizketetan oinarritu da. Guztira, 40 pertsona ingururekin hitz egin da, eta horietatik hogei bideoz grabatu dira.

Azken bi urteetan garatutako lana apirilaren 23an aurkeztuko da Errota kultur etxean, arratsaldeko 18:30ean. Egun horretatik aurrera, grabatutako narrazioak garaia.gerediaga.eus webgunean ikusi ahal izango dira. Era berean, liburua aurkezpen egunean eta ondoren salmenta puntu desberdinetan eta internet bidez eskuratu ahal izango da.