Amorebieta-Etxanoko Udala k adinekoen ongizatea eta bizi-kalitatea hobetzeko urrats berria eman du, lau lagunentzako etxebizitza komunitario bat martxan jarriz. Zerbitzu honek autonomia mantentzeko, ohiko ingurunean bizitzen jarraitzeko eta isolamendu-egoerak saihesteko aukera berriak eskainiko dizkie 65 urtetik gorako pertsonei, betiere I. mendekotasun-gradua aitortuta badute eta laguntza arinarekin moldatzeko adinako autonomia badute.
Etxebizitza berriak gehienez lau pertsonentzako lekua izango du, banakako bi logela eta logela bikoitz bat dituena. Espazio hau pertsonen independentziari eusteko pentsatua dago, ingurune seguruan eta beharren araberako laguntza jasotzeko aukerarekin. Udalak pertsonak gizarte-politiken erdigunean jarriko dituzten baliabideak garatzen jarraitzeko konpromisoa berresten du.
“"Amorebieta-Etxano adinekoek autonomiaz, segurtasunez eta bizi-kalitate onarekin bizitzen jarraitzeko moduko herria izatea nahi dugu. Badakigu urteek aurrera egin ahala beharrak aldatu egiten direla, eta pertsona guztien egoerak ez direla berdinak. Horregatik, Udaletik haien ondoan egon nahi dugu, dituzten beharrak entzun eta beren bizi-proiektua ahalik eta baldintzarik onenetan garatzen jarraitzeko baliabideak eskaini."
Zerbitzu honek adinekoei beren komunitatearen parte izaten jarraitzeko aukera emango die, harreman sozialak eta ingurunearekiko loturak mantenduz. Tutoretzapeko etxebizitza honek autonomia pertsonala, segurtasuna eta laguntza uztartzen ditu, eta nahi gabeko bakardade-egoerak eta isolamendu soziala prebenitzen lagunduko du.
Zerbitzuaren funtzionamendua arautzeko, Udalbatzak Adinekoentzako Udal Ostatu Zerbitzua Arautzeko Erregelamendua onartu du. Zerbitzua 65 urtetik gorakoentzat da, I. mendekotasun-gradua dutenentzat eta egonaldi luzeko edo behin betiko ostatu-aukera bat behar dutenentzat; salbuespenez, aldi baterako egonaldiak ere egiteko aukera izango da. Eskaera egin aurreko hamabi hilabeteetan Amorebieta-Etxanon erroldatuta egotea eskatzen da.
