Udalbatzarrak mozio bat onartu du gaurko udalbatzarrean, EAJ-PNVren, PSE-EEren eta Elkarrekin Podemosen aldeko botoekin, eta EH Bildu abstenitu egin dela. Mozioak ibilgailu eta edukiontzien suteak, hiri-altzarietan eta merkataritza-establezimenduetan eragindako kalteak, eta Ertzaintzako zein Bilboko Udaltzaingoko agenteen aurkako erasoak gaitzesten ditu. Era berean, gertakarien erantzuleek justiziaren aurrean erantzun dezatela eskatu du.
Onartutako testuak indarkeria, mehatxuak, hertsapenak eta ondasun publiko zein pribatuetan eragindako kalteak bateraezinak direla berresten du biltzeko, manifestatzeko eta adierazpen-askatasunerako eskubideen bidezko erabilerarekin. Udalak dei egin die eragile politiko eta sozialei zein herritar guztiei indarkeria oro bazter dezaten eta bizikidetza demokratikoa bide baketsuen bidez eta pertsona guztien eskubideak errespetatuz defenda dezaten.
Halaber, Udalak elkartasuna adierazi die istiluen ondorioz kaltetutako pertsona guztiei, bereziki auzotarrei, merkatariei, langileei eta kaltetutako ibilgailu zein establezimenduen jabeei. Era berean, larrialdi-zerbitzuek, Ertzaintzak eta Bilboko Udaltzaingoak egindako lana aitortu eta eskertu du.
Mozioak kezka agertu du muturreko eskuineko komunikazio-jardunbideekiko, gizartearen polarizazioa areagotzen eta bizikidetza ahultzen baitute. Gezurrezko albisteen hedapena, gorroto-diskurtsoak eta kolektibo jakin batzuk estigmatizatzen dituzten mezuak gaitzesten ditu. Udalak azpimarratu du indarkeria-ekintzak gaitzestea bateragarria dela jardunbide horiek baztertzearekin, eta egiazkotasunarekin, pluraltasunarekin eta errespetuarekin duen konpromisoa berretsi du.
