Usurbil F.T.-k bost hamarkadako ibilbidea ospatzen du aurten, eta hori dela eta, ekainera arte luzatuko den ekitaldi sorta bat iragarri du. Lehenengo bi ekintza nagusiak larunbat honetan, apirilaren 11n, izango dira Harane futbol zelaian.

Egun horretan, klubak Usurbil Cup Remember txapelketa berreskuratuko du. Ekimen honek iraganean herrian ospatzen zen Usurbil Cup gogora ekarri nahi du, eta 2010 eta 2017 artean jaiotako gazteek parte hartu ahal izango dute. Izen-ematea apirilaren 5ean itxi zen.

Futbol txapelketarekin batera, mus txapelketa bat ere antolatu da, herritar askoren eskaerari erantzunez. Lehiaketa larunbatean, apirilaren 11n, arratsaldeko 16:00etan hasiko da Harane futbol zelaian. Euria eginez gero, Haraneko lokal barruan jokatuko da. Izen-emateak 15:30ean irekiko dira, eta sari erakargarriak iragarri dira lehen hiru bikote sailkatuentzat: lehen saria txerrikume bat eta lau ardo botila izango dira, bigarren saria txuleta bat eta ardo botila bat, eta hirugarren saria gazta bat eta ardo botila bat.

Klubaren 50. urteurreneko ospakizun nagusia ekainaren 27an izango da, egun osoko jaialdi batekin. Antolatzaileek adierazi dutenez, "klubarentzat egun handia izango da. Goizeko ekintzetatik hasi eta gaueraino, gelditu gabe jarduera ezberdinak" antolatuko dituzte.

Jaialdi honen barruan bazkari bat antolatuko da, eta horretarako aurre-izen-ematea ireki da. Usurbil F.T.-k jakinarazi duenez, leku kopurua mugatua izango da, eta izena ematen lehenengoek izango dute lehentasuna. Aurre-izen-emate galdetegia maiatzaren 3a baino lehen bete beharko da. Bazkarira 16 urtetik gorakoek joan ahal izango dute, gurasoekin ez bada. Ordainketak izen-emate ofiziala egiterakoan bideratuko dira.