Udako etenaldiaren ostean, Lezoko Tipi-Topa programak ikasturte berriari ekin dio. Ostegunero, parte hartzaileek inguruetako ibilbideak osatuko dituzte. Luzeena egingo dutenek 10:45ean hasiko dute, eta laurden bat geroago, ibilbide laburragoa aukeratzen dutenek.
Udalak gogorarazi du programa hau adinekoentzat, bereziki 60 urtetik gorakoentzat eta ohiko jarduera fisikorik egiten ez dutenentzat dela, nahiz eta herritar guztiei zabalik egon. Jarduera fisikoa sustatzeaz gain, ekimenaren helburua da "parte hartzaileen ongizate fisiko eta mentalaz arduratzea eta harreman sozialak indartzea".
Ibilbideak "seguruak" direla eta ibilgarritasun zailtasunak dituztenentzat egokituak daudela adierazi dute. "Parte hartzaileek boluntarioen laguntza izango dute ibilbidean zehar, eta baita udalerriko Kirol Orientazioko Zerbitzuko arduradunaren laguntza ere", zehaztu dute.
Bakoitzean zehaztutako ibilbidea amaitzean, parte hartzaile guztiak herriko etxearen aurrean bilduko dira eta salda beroa dastatu ahal izango dute.
Udalak jakinarazi du ez dela beharrezkoa aldez aurretik izena ematea; nahikoa da ostegunetan Gurutze Santuaren plazara joatea. Gainera, udalak herritarrak animatu ditu Tipi-Topan parte hartzera, "harremanak indartzeko eta udalerriko kaleetan zehar paseatu eder bat egiteko aukera paregabea baita".
