Goiza euripean hasi bazen ere, herritarren berotasunak giro ederra sortu zuen Lezoko plazan. Aterkiak eskuan, haur, gazte eta heldu ugari hurbildu ziren azokara, gertuko merkataritzarekin, artisautzarekin eta herrietako bizitzarekin duten konpromisoa erakutsiz.
Bertan, saltoki txikietako produktuak ezagutu eta erosi ahal izan ziren, artisauen lana gertutik ikusi, tailerretan parte hartu, ikasi, dastatu eta partekatu. Txikiek zein helduek gozatu zuten, eta azokako txoko bakoitzean giro paregabea sortu zen.
Arratsaldeko 18:00etan hasitako txokolatadak eman zion amaiera bereziari egunari. GOZOA elkarteko gozogileek txokolatezko etxe ikusgarriak sortu zituzten, eta txokolate hori Lezoko herritarren artean banatu zen.
Haurren begietako distira, irribarreak eta une horretan partekatutako poza izan ziren eguneko oparirik ederrenak. Merkatariak pozik, herritarrak gustura eta antolatzaileak zoriontsu amaitu zen eguna, elkarrekin bizitako egun eder horietako bat izan zelarik.
