Lezoko Udala k aurrera darrai bere IV. Berdintasun Plana prestatzeko prozesuan. Aurreko planaren ebaluazioa eta udalerriko egoeraren diagnostikoa egin ondoren, planaren zirriborroa osatu du, datozen urteetako berdintasun-politikak zehazteko.
Prozesu honetan aurrera egiteko, udalak herritarrekin partekatu eta kontrastatu nahi du egindako lana. Horretarako, lan-saio bat antolatu du urriaren 26an, 18:00etan, Kultura Aretoan, Elhuyarren gidaritzapean.
Bi ordu inguruko saioa izango da, herritar guztiei irekia. Bertan, planaren zentzua eta egindako lanketa aurkeztuko dituzte, baita haren helburuak eta lanerako egiturak ere. Gainera, bertaratutakoen iritziak eta ekarpenak jasoko dituzte, dokumentua Lezoko errealitatera ahalik eta gehien egokitzeko eta lan-ildo errealak eta beharrezkoak ezartzeko.
Lezoko Udalak herritar guztiak gonbidatu ditu saioan parte hartzera, esperientziak, ikuspegiak eta proposamenak kontuan hartzea funtsezkoa baita berdintasunaren aldeko neurriak elkarrekin lantzeko eta udalerriko beharrei erantzungo dien plana osatzeko.
