Urumea Bizirik elkarteak eta mugimendu ekologistak salatu dutenez, Endesa multinazionaleko karguak atzean dituzten Enigma eta Arena Green Power enpresek sustatutako "Ikatz Gane" izeneko proiektuak eragin "oso kaltegarria" izango luke inguruko mendietako landaredian eta faunan, eta "landa eremuaren pobretzea" ekarriko luke.
Proiektuak 33 MW-ko bost aerosorgailu erraldoi aurreikusten ditu Pagalegi eta Etxolaberri inguruetan, Ereñotzutik gora, Hernani eta Arano arteko mugetan. Alegazioak aurkezteko epea maiatzaren 4an amaitzen da, eta Urumea Bizirik elkarteak "herri-alegazioak" egiteko dokumentu bat prestatu du, herritarrek Eusko Jaurlaritzako Industria, Trantsizio Energetiko eta Jasangarritasun Sailean aurkez ditzaten.
“"Eskala handiko halako proiektuak ez dira bateragarriak bertako energia komunitarioaren kudeaketarekin, espekulazioa baino ez dutelako sortzen."
Salaketen arabera, proiektuak Urumeako mendien "industrializazioa" eta "landa eremuaren pobretzea" ekarriko lituzke. Gainera, Aiako Harria Parke Naturalaren eta Leitzarango Biotopoaren arteko korridore ekologikoa "arriskuan" jarriko luke, eta zuzenean eragingo lieke bertako landarediari, espezie endemikoei, faunari eta akuiferoei.
Urumea Bizirik elkarteak proiektua aurkezteko prozedura bera auzitan jarri du, "informazio gabezia" eta "gardentasun falta" handia izan direla argudiatuz, eta herritarrak "babesik gabe" aurkitu direla adieraziz. Kaltetutako udalei azken momentura arte kontsultarik ez egitea ere oztopo handia izan da alegazioak aurkezteko, epeak "motzak" direlako.
Mugimendu ekologistako kide batek aurkeztutako beste alegazio batean, proiektua Hernaniko hirigintza-planak kaltetutako eremu horri aitortzen dizkion balioekin bateraezina dela salatu da, eta plan berezi bat egitea derrigorrezkoa litzatekeela adierazi da, horretarako udalaren baimena beharko litzatekeelarik.
