Trenbide berri honek Amara eta Pasaia arteko geltoki guztietan 7,5 minutuko maiztasunak eskaintzea ahalbidetuko du. Orain arte, maiztasun hori Herreraraino bakarrik zegoen eskuragarri, eta Altzan eta Pasaian 15 minutuko itxaronaldiak izaten ziren.

Proiektuaren xehetasunak Pasai Antxoko Gure Zumardia plazaren azpiko geltokian aurkeztu dira. Saihesbide berria martxan jartzean, Altza geltokia ez da irteera gabekoa izango, laster inauguratuko den Pasai Antxoko lur azpiko geltoki berriarekin lotura izango baitu. Aurrerago, terminal zaharra desegin eta Pasai Antxo zeharkatzen duen zubibidea kenduko da.

Obra zuzendaritzak azaldu duenez, geltoki berriaren atondoaren barruan amaitu dira Altza eta Galtzaraborda arteko plaka gaineko trenbidea egikaritzeko lanak. Galtzarabordatik hurbilen dagoen tartea, balasto gaineko trenbidea, baino ez da falta. Terminala ia amaituta dago, eta trenbideko obra zibila ekainean amaituko da, sarrerako koralina eta metal arotzeriako erremateak, aireztapen esparruetako trenkadak eta gela teknikoak egitearen faltan.

Instalazioei dagokienez, geltokiaren muturretan dauden nasa azpiko aireztapenak eta larrialdikoak mihiztatzen ari dira. Era berean, seinaleztapen lanek aurrera jarraitzen dute, eta katenaria zurrunari dagozkion barrak jartzeko lanak hasi dira. Galtzarabordan, berriz, aurrera egin da hormak zimendatzeko lanetan, eta lanak egiten ari dira bai hormen amaieran, bai plaka balasto trantsizioko lauzan eta tunelaren irteeraren eta geltokiaren beraren artean dagoen balasto gaineko trenbidean.