Eusko Jaurlaritzako Mugikortasun Jasangarriaren Sailaren Euskal Trenbide Sarea (ETS) erakunde publikoak gauzatutako lan berriei esker, Altzako ‘zaku hondoa’ ezabatuko da eta tren-pasabide bilakatu; ondorioz, nabarmen hobetuko da garraio publikoaren zerbitzua.
Susana García Chuecak, Mugikortasun Jasangarriaren sailburuak, zerbitzuaren hobekuntzaren xehetasunak azaldu ditu gaur goizean, eta Altza eta Pasaia lotzen dituen lurpeko zati berrian barrena ibili da Euskotrenen tren-unitate batean. Bidaia horretan, Miguel Ángel Paez Azpiegituren eta Mugikortasun Jasangarriaren sailburuordeak, Antonio López ETSko zuzendariak eta Yon Pérez Euskotreneko zuzendariondokoak lagun izan dituzte.
Zehazki, Altzako geltokian eta Pasai Antxoko geltoki berrian (uztailaren 18an bertan zabalduko da, eta egungoa ordezkatuko du), trenen maiztasuna bikoiztu egingo da. Horrela, Amararekiko lotura 7,5 minutuan behin eskainiko da lanegunetan eta asteburuetan arratsaldez (orain 15 minutuan behin). Asteburuetan, goizetan, 15 minutuan behin izango da (orain 30 minutuan behin), eta 30 minutuan behin larunbat gauetan (orain 60 minutuan behin).
García Chuecak azaldu duenez, maiztasun berriak “aurrerapauso garrantzitsua dira Mugikortasun Jasangarriaren Sailak duen helburuan, alegia, Gipuzkoako tren-zerbitzuko itxarote-denborak murrizteko helburuan”. Gaineratu duenez, “orain arte Amara-Herrera tartean gertatzen zen moduan, Pasaian eta Altzan bizi diren pertsonek, hemendik aurrera, ez diote hainbeste begiratu beharko erlojuari”.
ETSk Eusko Jaurlaritzaren funtsekin egin ditu obrak. Zerbitzua martxan jarri aurretik, Euskotren proba-zirkulazioak egiten ari da ekaina erdialdeaz geroztik, azpiegituran zein material mugikorretan egiaztapen tekniko guztiak egiteko. Gainera, 150 gidari baino gehiago prestatu dira zati berriaren ezaugarriak, gidatzea eta segurtasun alderdiak lantzeko.
Maiztasuna areagotzeko, tren-kopurua ere handitu da. Flota 67 unitatera iritsiko da bost konboi berri gehitzean, eta horrek Euskotreni gaitasun handiagoa emango dio eskaintza erregularrari zein ekitaldietako zirkulazioei erantzuteko. Gaur egun, lanegunetan 136 tren-zirkulazio egiten dira Altzan eta Pasaian, eta saihesbide berria martxan jarri ondoren, 274 izango dira.
Uztailaren 18an, larunbatean, Topoko trenek lehenbizikoz egingo dute geldialdia Pasaiako lurpeko geltoki berrian. Geltoki honek Antxoko barrutiaren fisionomia aldatuko du, etorkizunean erabiliko ez den tren-biaduktua eraistea ahalbidetuko baitu. Geltokiaren gainean sortu den Gure Zumardia plazan, ekintzez beteriko eguna antolatu dute Mugikortasun Jasangarriaren Sailak, ETSk eta Euskotrenek, geltoki berriari eta maiztasun berriei ongietorria emateko.
