Lezoko Udala k eta Balea Zuriak antolatutako Poesia Kaiak jaialdiaren seigarren edizioak bi hitzordu izango ditu azaroaren 19an eta 21ean. Jaialdiak poesia herritarrengana gerturatzea eta Lezon disziplina kultural anitzeko eskaintza sustatzea du helburu, Aitzol Saizar Lezoko Udaleko kultur zinegotziak azaldu duenez.
Lehen hitzordua azaroaren 19an izango da, 19:00etan, Kultura Aretoan. Bertan, Oihane Zuberoa Garmendia k 'Zergatik eta zertarako irakurri Rilke' solasaldi poetikoa eskainiko du.
Bigarren saioa, aldiz, azaroaren 21ean izango da, 19:00etan, Gezala auditoriumean. Poesia-errezitaldi honetan Raquel Santanera Vila poeta katalanak, Elena Sánchez bizkaitarrak eta Iban Garro Alzuri Bortzirietako poetak parte hartuko dute. Bakoitzak bere hizkuntzan errezitatuko du, eta poemak itzulita banatuko dituzte bertaratzen diren pertsonen artean. Jon Imanol Etxabe tenoreak eta Jon Makuso Arrizabalaga biolin-jotzaileak musikaz lagunduko dute saioa.
Ainhoa Salaberria kultur teknikariak gogorarazi duenez, bi hitzorduak doakoak eta herritar guztiei irekiak izango dira. Juan Ramon Makuso k, berriz, poesiaren eta kulturaren eraldatzeko gaitasuna nabarmendu du, eta lezoarrak jaialdira erakartzeko nahia azaldu du: «kultura behar dugu gure burmuinak astintzeko, eta poesia, batez ere, iraultzailea izan daiteke».
