Aurtengo Euskal Jaiak ospakizunaren egitaraua aurkeztu dute Ttakun Kultur Elkarteak eta Lasarte-Oriako Udalak, iazko edizioaren arrakastatik abiatuta. Festa nagusia irailaren 26 an izango da, goizeko 09:30 etik gaueraino, 01:00 ak arte luzatuko dena.
Aurten musikak protagonismo handiagoa izango du, bost jarduera antolatuko baitira horren inguruan: Txistularien diana, Alboka abesbatzaren emanaldia eta kantu-jira, Andoni Ollokiegiren bazkalosteko saioa, arratsaldeko kalejira, dantza saioa, Oaintxe in deu! txarangaren poteo musikatua eta iluntzeko kontzertu bikoitza. Gazteen eskaerei erantzunez, bi talde arituko dira oholtzan: Antiguoko Herenegun taldea eta Auskalo herriko erromeri taldea.
Aurreko edizioan izandako harrera ona dela eta, berriz antolatuko da Euskal Herriko Emakume Sortzaile eta Ekoizleen azoka. Dinagu Kolektiboko artistak Okendo plazan bilduko dira goizean. Azokaz gain, herriko bazkaria ere errepikatuko da, baina aurten ez da ziro-janik izango eta haurrentzako menu berezia eskainiko da. Txartelak irailaren hasieran jarriko dira salgai, eta helduek 25 euro ordaindu beharko dute, haurrek, berriz, 15 euro.
Aurtengo nobedadeen artean, kuadrillen arteko Igo Euskal Jaiak Proba Mistoa egingo da. Parte hartu nahi dutenek kultura@lasarte-oria.eus helbidera idatzi beharko dute izena emateko. Bestetik, Okerra harria txapelketa ere izango da, iazko erakustaldiaren ordez. Lasarte-Oriako Euskal Jaiaken ikur hau nabarmentzea du helburu, Estitxu Alkorta Euskara saileko arduradunak adierazi duen bezan.
Amaitzeko, herriko eragile bat omenduko da aurten lehen aldiz. Euskara sustatzeagatik nabarmendu den elkarte, norbanako edo eragile batek jasoko du errekonozimendua, Euskararen Maratoia ospatuko dela kontuan hartuta. Saridunak Zurmailu Zurlanketa Elkarteak egindako Okerra harriaren erreplika jasoko duela aurreratu du Agustin Valdivia alkateak.
Programa hau osatzeko, hainbat herriko eragilerekin elkarlanean aritu dira. Mari Karmen Ormazabal Ttakun K.E.ko ordezkariak azpimarratu du talde-lana izan zela iazko arrakastaren gakoetako bat. Horrela, Lasarte-Oriako Txistulari Taldea, txalapartariak, Alboka Abesbatza, Zero Sette, Zabaleta Auzolan, Earra Bertso-Eskola, Oiarte, Ostadar, LOZET, Zurmailu, Tirriki Tarraka, Erketz Euskal Dantza Taldea, Plazadantza taldea, Kukuka, Oiantxe in deu! txaranga eta Auskalo Taldea izango dira parte hartzaile.
