ASPEGI, Gipuzkoako Emakume Ekintzaile, Profesional eta Zuzendarien Elkarteak, Beterri-Buruntza Mankomunitatearekin elkarlanean, Konektatuz ekitaldiaren IV. edizioa antolatu du. Ekitaldia maiatzaren 21ean, ostegunean, 13:00etan hasiko da, Astigarragako Erribera kulturunean, Laboral Kutxa eta Gipuzkoako Foru Aldundiaren babesarekin.

Ekitaldi hau hausnarketa, inspirazio eta konexiorako gunea da. Helburua da lurralde ezberdinetara hurbiltzea eta Gipuzkoako emakumeen talentua, lidergoa eta ekarpen ekonomiko, profesional eta soziala balioan jartzea.

Oraingo honetan, jardunaldiak Beterri-Buruntza lurraldeari jarriko dio arreta eta bertako emakume erreferenteak bilduko ditu mahai-inguru batean. Mahai-ingurua Nerea Basurto Arraztiok moderatuko du eta parte-hartzaileak honako hauek izango dira: Alaitz Tolosa Irazusta (Talleres Mitxelena S. Coop.-eko Proiektu Estrategikoen arduraduna), María Herrero Eizmendi (Herrekor S.L.U.-ko gerentea), Norexis Carilin Orellanas Araujo (Chimeneas Erre Berri S.L.L.-ko bazkidea), Silvia Roson Goikoetxea (Laboral Kutxaren Hernaniko bulegoko zuzendaria) eta Sonia Valor Cuadrado (Baihome Servicios Inmobiliarios-eko sortzailea).

Ekimen honen bidez, Mankomunitateak eta ASPEGIk «topaguneak bultzatzea bilatzen dute, emakume erreferenteak eta esperientziak ikusgarri egiteko, eta lurraldeko emakume profesional eta ekintzaileen artean sareak eta lankidetza sustatzeko».

Antolatzaileek adierazi dutenez, ekitaldia irekita dago pertsona guztientzat eta networking aukera eskainiko duen lunch txiki batekin amaituko da. Sarrera doakoa da, lekua bete arte.